ATKV oorkonde vir lewenslange bydrae tot Afrikaans

Prof Susan Smith ontvang die ATKV Oorkonde vir Lewenslange Bydrae tot Afrikaans en haar dogter en derdejaarstudent by Universiteit van Fort Hare, Carien Smith, ontvang ‘n Afrikoon-toekenning vir kreatiewe bydrae tot Afrikaans. Die oorhandiging is in Pretoria gedoen deur Dr Danny Titus, van die ATKV. (2015)

Image may contain: 2 peopleImage may contain: 2 people
Advertisements

Neville Alexander toekenning vir multitaligheid en Afrikaans

Lees die berig by Die Afrikaanse Taalmuseum

Drie medewenners: Neville Alexander-prestige-eerbewys

neville-alexander-prestige-eerbewys-wenners-2Fiona van Kerwel (WOW-projekbestuurder),
Elizabeth Dennise van Schalkwyk en prof Susan Smith

Die Raad van die Afrikaanse Taalmuseum en -monument (ATM) het op Erfenisdag die 2016 Neville Alexander-prestige-eerbewys aan drie medewenners, twee individue en een instelling, toegeken. Die wenners is Elizabeth Dennise van Schalkwyk, prof Susan Smith en die Woorde Open Wêrelde (WOW) projek van die Universiteit Stellenbosch (US) Woordfees.

Die Voorsitter van die ATM-Raad, prof Mashudu Mashige, het sertifikate aan Van Schalkwyk, prof Smith en Fiona van Kerwel, projekbestuurder van WOW, oorhandig. Elke wenner ontvang ook prysgeld van R10 000 vir ‘n relevante taalprojek.

Volgens Michael Jonas, Direkteur van die ATM, is die eerbewys ’n poging om erkenning aan die onbesonge helde van Afrikaans te gee en om taalprojekte te bevorder: “Alexander was ‘n bekroonde taalkundige, opvoedkundige en akademikus, wat hom sterk beywer het vir veeltaligheid en moedertaalonderrig in Suid-Afrika. Die eerbewys word toegeken aan  ʼn geskikte kandidaat of instelling wat ʼn beduidende bydrae op voetsoolvlak in die gemeenskap gelewer het op enige gebied van Afrikaans as moedertaal of voorstander van veeltaligheid.”

Van Schalkwyk is ‘n prokureur van Johannesburg wat reeds sedert 2009 Afrikaans as tweede taal onder nie-Afrikaanssprekendes, waaronder buitelanders, bevorder. Sy spandeer sowat vyf uur per week om graad 12-leerders, wat met Afrikaans as tweede taal op skool sukkel, te ondersteun. Van Schalkwyk laat dié leerders kinderboeke lees, wat volgens haar “soos ʼn bom” werk om hul taalvaardighede te verbeter. Sy wil haar prysgeld gebruik om ʼn groter verskeidenheid Afrikaanse leesboeke en hulpbronne aan te koop.

Prof Smith is benoem vir haar toewyding tot die totstandkoming en uitbou van die Department Afrikaans aan die Universiteit van Fort Hare. Tertius Kapp skryf in sy motivering: “Bo en behalwe haar eie akademiese uitsette, wat behels vele vooraanstaande navorsingsartikels, veral in die nuwe veld van eko-kritiek, en haar eie digterlike werk, behartig sy ʼn enorme hoeveelheid administrasie en loods sy projekte wat op kreatiewe wyse die unieke uitdagings van haar direkte omgewing aanspreek. In ʼn tyd waar studente by vele tersiêre instellings negatief reageer op Afrikaans, is dit bewonderenswaardig dat Afrikaans by die Universiteit van Fort Hare nie net een van studente se gunsteling departemente is nie, maar ook deur personeel as ‘n broodnodige deel van die universiteit gesien word. Dit is ʼn direkte gevolg van Susan Smith en haar personeel se werk.”

Die Woorde Open Wêrelde (WOW) jaarprojek van die US Woordfees is gerig op woordvaardighede, lees, geletterdheid en die kunste, met Afrikaans as fokustaal. Naas ’n groot aantal WOW-aktiwiteite wat aangebied word tydens die jaarlikse US Woordfees word talle projekaksies deur die jaar aangebied, soos skrywersbesoeke aan skole, leeskringe, leesfeeste, skoolkoerante, debatfeeste, kuns en- kultuurfeeste, werkswinkels, kompetisies en veral die snelgroeiende nasionale Sanlam WOW Spelfees. ’n Belangrike fokus van die WOW-projek is om belowende leerders te identifiseer en hulle aan te moedig tot tersiêre studie, veral binne die Fakulteit Lettere en Sosiale Wetenskappe.

Die medewenners van die eerste prestige-eerbewys, in 2015, was die fakulteit onderwys van die Kaapse Skiereiland Universiteit van Tegnologie (KSUT) in Wellington, en Sabina Dumas, opvoeder aan New Orleans Sekondêre Skool in die Paarl. KSUT het vier behoeftige Afrikaanse studente se klasfooie met hul prysgeld gedek. Dumas het ingeteken op Die Burger sodat 250 leerders dié koerant en susterkoerante digitaal kan lees. Sy het verder uitgawes vir verskeie projekte geborg, waaronder leerders se deelname aan die WOW-Spelfees en ‘n skoolkoerantkursus. Volgens Dumas het die toekenning verskeie deure vir haar leerders oopgemaak, “blootstelling wat baie meer as geld beteken”.

Vir navrae, kontak die Direkteur, Michael Jonas, by 021 872 3441 of admin@taalmuseum.co.za.

Oktober 2016

Susan Smith ontvang ATKV/SA Akademie Navorsingsprys 2014

Die Afrikaanse Taal- en Kultuurvereniging (ATKV) stel jaarliks prysgeld van R60 000 beskikbaar vir die bekroning van ses gepubliseerde Afrikaanse artikels wat in ’n betrokke jaar in ’n geakkrediteerde tydskrif verskyn het. Vier pryse is bestem vir artikels in die geesteswetenskappe en twee vir artikels in die natuurwetenskappe. Die Suid-Afrikaanse Akademie vir Wetenskap en Kuns hanteer die keuringsproses.

Vanjaar is die beste artikels wat in 2012 verskyn het en deur redakteurs van geakkrediteerde tydskrifte aan die Akademie voorgelê is, beoordeel. Daar is 16 artikels uit 8 tydskrifte voorgelê en die pryswenners van die van die ATKV/SA Akademieprys 2014 is pas bekend gemaak.

Drie van die wenartikels is in LitNet Akademies gepubliseer. Die pryse is toegeken aan:

Susan Smith, Departement Afrikaans, Universiteit van Fort Hare vir haar artikel: “Plek en ingeplaaste skryf. ’n Teoretiese ondersoek na ingeplaaste skryf as ekopoëtiese skryfpraktyk” wat in LitNet Akademies, jg 9, no 3, Desember 2012 verskyn het.

Volledige artikel op LItNet

Susan Smith

Francis Galloway
Redakteur: Geesteswetenskappe

JM (Jannie) Otto, Departement Privaatreg, Universiteit van Johannesburg vir sy artikel “Die afkoelreg in die Nasionale Kredietwet en die Wet op Verbruikersbeskerming” wat in LitNet Akademies, Jg 9, no 1, Maart 2012 verskyn het.
Jannie Otto

Johann Neethling
Redakteur: Regte

Helgard Raubenheimer, Departement Chemie en Polimeerwetenskappe, Universiteit Stellenbosch vir sy artikel “Asikliese karbeenkomplekse maak eerste opslae in goudstormloop” wat in LitNet Akademies, jg 9, no 3, Desember 2012 verskyn het.
Helgard Raubenheimer

Dirk Laurie
Redakteur: Natuurwetenskappe

 

Image may contain: 2 people, people smiling

Prof Susan Smith en Mnr Japie Gouws, van die ATKV, tydens die oorhandiging by NMMU in Port Elizabeth.

Taalbeleid by UFH

Taalbeleid by die Universiteit van Fort Hare

Die Burger

Beeld

Volksblad

22/11/2013

In ‘n rigtinggewende stap het die Universiteit van Fort Hare einde 2013 ‘n nuwe taalbeleid aanvaar. Professor Susan Smith, Departementshoof van Afrikaans en lid van die Taalkommitee van die Universiteitsraad, het ‘n leidende rol gespeel in die totstandkom en aanvaarding van hierdie beleid.

Die hersiene taalbeleid wat eenparig deur die Senaat van die Universiteit van Fort Hare aanvaar is, is ‘n oorwinning vir ‘n multitalige en multikulturele benadering en in ooreenstemming met nasionale taalbeleid.

Die taalbeleid maak voorsiening vir die insluiting van Afrikaans, naas Engels en IsiXhosa, as een van die amptelike tale van die instansie, wat ‘n weerspieëling is van die multikulturele en multitalige demografie van die universiteit en ‘n bewustelike houding van insluiting kommunikeer. Die doelgerigte en aktiewe ontwikkeling van IsiXhosa en sy funksies tot volwaardige akademiese taal, en ‘n erkenning van die waarde en status van hierdie taal sal ‘n belangrike komponent van die toepassing van hierdie taalbeleid uitmaak. So tree die Afrikatale ook toe tot die meertaligheidsdebat en word ‘n belangrike vennootskap met Afrikaans gesmee, wat tot wedersydse voordeel sal lei.

Die oorlewingskrag van ‘n taal word nie net gemeet aan die hoeveelheid sprekers wat die taal op ‘n informele en spontane wyse gebruik nie; soveel meer is op die spel. Dit is veral die sogenaamde hoër funksies van ‘n taal wat bepalend is vir lewenskrag: dit sluit in die gebruik van ‘n taal op ‘n formele vlak soos byvoorbeeld in staatsinstansies, in kerke, in howe, as onderrigtaal en in die openbare media; ook as taal waarin belangrike literêre tekste gepubliseer word. Dit het veel te make met die amptelike status wat ‘n taal beklee, d.w.s. die waarde en erkenning wat aan ‘n taal toegeken word.

In ‘n tyd wat Afrikaans toenemend onder druk kom by talle tersiêre instansies en waar Afrikaanse departemente in sommige gevalle gesluit is, is die erkenning wat by die Universiteit van Fort Hare aan Afrikaans gegee word, beduidend en moet geprys word. Dit beteken onder andere die insluiting van Afrikaans (saam met isiXhosa) tydens universiteitsgeleenthede, op amptelike dokumente, korrespondensie en beleidstukke – en dit by ‘n universiteit wat tot op hede uitsluitlik Engels vir al hierdie funksies gebruik het.

Die groot uitdaging vir die universiteit sal die effektiewe toepassing van die nuwe taalbeleid wees, ‘n voortdurend evolerende proses wat sal afskop met die totstandbring van ‘n Taalsentrum. Dit vra om ‘n daadwerklike verbintenis tot, ‘n beteknisvolle implementering en ‘n toegewyde bestuur van die beleid.

LEES DIE BERIG IN DIE BEELD

Susan Smith, Afrikaans, UFH

Afrikaans in die nuus by UFH

Afrikaans in die nuus by UFH

Susan Smith, Afikaans, UFH

 

Stille stryder vir Afrikaans

Rapport

2010-11-20 21:58

Berig: René-Jean van der Berg

Foto: Denvor de Wee

Terwyl die groot taalstryders om die behoud van Afrikaans op talle kampusse stry, werk
dr. Susan Smith stil-stil met ’n groep studente in Afrikaans op die Fort Hare Universiteit
se Oos-Londen-kampus.

Al sê akademici die Afrikaansvuur brand nie meer so hoog nie, is dit die klein, smeulende kooltjies wat dié taal van uitwissing kan red.Dié klein kooltjies is wat dr. Susan Smith, digter en hoof van die departement Afrikaans by die Fort Hare Universiteit in Oos-Londen, in die harte van jong studente aanblaas.

“My werk is hiér. Daar is genoeg mense wat in Stellenbosch op die verhoog kan klim en vir die taal baklei. Aan so ’n aggressiewe debat neem ek nie graag deel nie,” sê Smith, wat in 2002 bekroon is met die Premierstoekenning van die departement van kuns en kultuur in die Oos-Kaap vir haar bydrae tot die Afrikaanse taal en letterkunde in die Oos-Kaap.Toe die Afrikaansdepartement van die Fort Hare-universiteit in Alice in 2004 weens lae studentegetalle sluit, het juis dié debatte en noodkrete woes deur die land getrek oor die taal nou kwansuis besig is om te sterf. Die Rhodes-universiteit het in 1997 ’n satellietkampus in Oos-Londen geopen, waar Smith Afrikaans gedoseer het.

In 2005 het die Rhodes-satellietkampus saamgesmelt met die Fort Hare-universiteit.Smith het toe die kans gekry om ’n volledige Afrikaansdepartement tot stand te bring. In 2005 is daar met net nege eerstejaars begin en vanjaar is 109 studente vir die vak Afrikaans ingeskryf. Van dié groep is daar twee doktorale, twee MA- en vier honneursstudente.Baie van die voorgraadse studente is Xhosa- of Engelssprekend en neem dus die taal as hul tweede of derde taal. Smith verduidelik op voorgraadse vlak word die vak in twee strome verdeel: prakties en akademies. Veral die nie-Afrikaanssprekendes bestudeer die taal op praktiese vlak. Daar is egter ook studente wat baie negatiewe persepsies oor die taal het, maar Smith spog dat die persepsies nie van lange duur is nie.

Smith en haar medelektor, mev. Shamiega Chaudhari, verduidelik sommer op eerstejaarsvlak aan nie-Afrikaanssprekendes dat jy nié jou eie taal, geskiedenis en kultuur verraai deur Afrikaans te neem nie.“Van die negatiewe persepsies is dikwels deur die geskiedenis heen en selfs op skoolvlak in die studente ingemessel. Hul ouers se idee rondom Afrikaans het ook ’n groot invloed op hoe húlle die taal sien en ervaar. Ons probeer om ons klasse prettig te hou om dié idees af te breek. Dit is in dié klasse wat die studente vir die eerste keer leer hoeveel hul eie taal en kultuur Afrikaans beïnvloed het. “Dan besef hulle Afrikaans is nié ’n Europese taal nie, maar ons éie taal. Dan dink hulle, ‘hei, ek kan mos ’n stukkie van my hart ook vir dié taal gee’.”

Smith debuteer in 1997 in Nuwe Stemme 1 en van haar gedigte word daarna in verskeie publikasies opgeneem, o.a. in Groot verseboek (2000), Versereise (2001), Raamwerk 11 & 12 (2001), Pret met poësie (2007), Versjoernaal (2008), Groot verseboek (2008), De Onbestemmelingen (2011) (saam met ’n Nederlandse vertaling van haar gedig deur Gerrit Komrij) en Vonkverse (2011). Een van haar gedigte is nasionaal voorgeskryf vir gr. 12-leerlinge.

LEES BERIG IN RAPPORT HIER

Gemeenskapsbetrokkenheid en studenteaktiwiteite

Afrikaanse Feesaand, studentedrama, ATKV studentetak, Forum vir Afrikaanse onderwysers:

 

Afrikaanse aand 2012.1l00015   

    Afrikaanse aand 2012.2l00005

Studentedrama

UFH Kaap Toer 1 052  UFH Kaap toer 2013 015

Besoek aan die Afrikaanse Taalmuseum in die Paarl en Dianna Ferrus tydens die Kaapse taaltoer

 

2013 ATKV.1l00024   April 2012 018

Eerste student ATKV-tak in die land, so hoor ons!      Nederlands by UFH met Dr Daniël van Olmen

UFH Kaap Toer 1 128   214

Taalmonument en Tafelberg

179

Op Seinheuwel